प्रदेश रा 22 ज़िलां मांय हाल तांई असामान्य बारिश दर्ज करी ज्यी है, जद के 17 ज़िलां मांय सामान्य ऊं बत्ती बरसात व्ही है। जल संसाधन विभाग री ओर ऊं जारी आंकड़ां रे मुजब एक जून ऊं सोमवार ने तांई केवल बाड़मेर अर सलूम्बर मांय सामान्य बरसात व्ही है। चोखा मेह रे पाण प्रदेश रा तळावां-बंधां मांय ऊं करीब 85 फीसदी भर ग्या है। ईं बीचे, सोमवार ने ई सीकर, अजमेर, बांसवाड़ा, बारां, पाली, चूरू अर सवाईमाधोपुर समेत केई ठौड़ां बरसात व्हेवण रा समाचार है, जिण ऊं केई जगहां नदी-नाळा मांय पाणी उफण रह्यो है। सीकर मांय व्ही झमाझम बिरखा ऊं जिन्दगी माथे घणो असर पड़्यो। जयपुर रा गांवाई हलकां नरैना, दूदू, सांभर अर फुलेरा मांय लगातार व्हे रही तेज़ बारिश ऊं नीचला हलकां मांय पाणी भर ग्यो। समाचार मांड्या जावण री बगत जयपुर शहर मांय ई झमाझम मेह बरस रह्यो हो। बांसवाड़ा ज़िला मांय छड़ी-बीछड़ी बिरखा व्ही। माही बंधा रा आठ दरुजा खोल र बत्तो पाणी निकाळ्यो जा रह्यो है। प्रतापगढ़ ज़िला मांय जाखम बंधा ऊं ई बत्तो पाणी निकाळ्यो जा रह्यो है। बारां मांय ई आखा दिन रुक-रुक र बरसात व्हेवण रा समाचार है। चूरू मांय ई बिरखा रो पाणी निकाळबा रा पुख्ता प्रबंध करी ज्या है। भारी बारिश ऊं कुशलगढ़ हलका रा खेरिया पाड़ा तळाव री पाळ टूट जावण रो अंदेशो है। सवाईमाधोपुर ज़िला रा 18 मांय ऊं 16 बंधां माथे चादर चाल रही है। अजमेर ज़िला मांय श्रीनगर रा बालद का दड़ा तळाव मांय करीब 50 साल पाछे ईं साल चादर चाली। आना सागर अर वरूण सागर झील मांय ई ते़ज़ी ऊं पाणी आ रह्यो है। सिरोही ज़िला रो बनास बंधां माथे ई रपट चाल रही है। पाली रा गजनाई अर कंटालिया बांध माथे रपट चालण ऊं सवराड़ अर सुकड़ी नदियां मांय पाणी उफण रह्यो है। खतरा ने ध्यान राखता थकां प्रशासन सोजत-सिरियारी स्टेट हाईवे अर बगड़ी गेलो बंद कर दीनो है। जवाई बांध मांय लगातार पाणी आ रह्यो है। ईं बीचे राज्य मांय घणखर ठौड़़ां आवता दिनां चोखी बिरखा व्हेवण रा आसार है। मौसम विभाग सोमवार ने अलवर, झुंझुनूं, खैरथल-तिजारा अर कोटपूतली-बहरोड़ मांय भारी बरसात रो ऑरेंज अलर्ट जारी कीनो है, जद के 29 ज़िलां सारु येलो अलर्ट जारी करी ज्यो है। मौसम केन्द्र जयपुर रा निदेशक राधेश्याम शर्मा बतायो के राज्य मांय सितम्बर महीना मांय सामान्य अर सामान्य ऊं बत्ती बारिश व्हेवण री संभावना है।