प्रदेश रा सात विधानसभा हलकां मांय व्हेवण वाळा उपचुनाव सारू सियासी हलचल लगातार जोर पकड़ रही है। भाजपा उपचुनाव सारू 7 मांय ऊं छह सीटां माथे उम्मीदवारां रा नाम रो ऐलाण कर दीनो है। अब केवल चौरासी सीट माथे भाजपा रा उम्मीदवार रा नाम रो ऐलाण बाकी है। दूजी कानी प्रदेश कांग्रेस कमेटी वार रूम मांय प्रदेश समन्वय समिति री मीटिंग राख्यी ज्यी। पार्टी रा प्रदेश प्रभारी सुखजिन्दर सिंह रंधावा री सदारत मांय राख्यी ज्यी मीटिंग मांय कांग्रेस रा आला नेतावां री मौजूदगी मांय उपचुनाव री रणनीति रा बारा मांय चर्चा करीजी। कांग्रेस हाल तांई किण ई सीट माथे उम्मीदवार रा नाम रो ऐलान नी कीनो है। प्रदेश कांग्रेस अध्यक्ष गोविंद सिंह डोटासरा साफ कीनो है के वां री पार्टी विधानसभा उपचुनाव मांय किंण ई पार्टी सागे गठजोड़ नी करेला।आवता विधानसभा उपचुनाव रे दौरान 7 विधानसभा हलकां मांय ई वोट देवण वाळा बुजुर्गां अर दिव्यांग जन ने घर ऊं वोट देवण रो सुबीतो मुहैया करायो जावेला। 85 साल ऊं बत्ती उम्र रा बुजुर्ग अर चालीस फीसदी ऊं बत्ती दिव्यांगता वाळा मतदाता घर ऊं वोट देवण सारू तैय फॉर्म 12-डी मांय 23 अक्टूबर तांई बूथ लेवल अहलकार सामी अर्जी दे सके है। मुख्य निर्वाचन अधिकारी नवीन महाजन बतायो के घर ऊं वोट देवण सारू हाल तांई 2 हजार 431 मतदातावां री अर्जियां मिली है। ईं बीचे प्रशासन ई उप-चुणाव री तैयारियां मांय लाग्योड़ो है। टोंक री जिला निर्वाचन अधिकारी डॉ. सौम्या झा देवली-उनियारा विधानसभा उपचुणाव री तैयारियां रा तैत वोटां री गिणती री ठौड़ राजकीय पी.जी. महाविद्यालय, बहीर रोड़ रो दौरो कीनो अर अहलकारां ने ज़रुरी हुकम दीना। दौसा मांय वोट देवण वाळां मांय स्वीप गतिविधियां रे मार्फत जाग जगावण सारू आज श्री रामकरण जोशी राजकीय उच्च माध्यमिक विद्यालय अर सोमनाथ चौराहा माथे श्रमिक चौपाल राख र वोट जरूर देवण री अपील करीजी। उपचुनाव सारू हाल तांई एक पर्चो दौसा सीट सारू दाखिल करी ज्यो है। ईं बीचे आबकारी विभाग उपचुणाव वाळा हलकां मांय 11 नवम्बर ने सिंज्यां 6 बज्यां ऊं 13 नवम्बर सिंज्यां छह बज्यां तांई सूखा दिवस रो ऐलाण कीनो है। वोटां री गिणती रे दिन 23 नवम्बर ने जिला मुख्यालय झुंझुनू, अलवर, दौसा, टोंक, नागौर, उदयपुर अर डूंगरपुर जिला रा नगरपालिका या नगर परिषद हलका मांय ई सूखा दिवस रो ऐलाण करी ज्यो है।