प्रदेश रा सगळा मेडिकल कॉलेजां मांय अंगदान अर ऊपतू अंग लगावण रो सुबीतो मुहैया करावण री कोशिश करी जावेला। चिकित्सा शिक्षा सचिव अम्बरीष कुमार अंगदान दिवस रा सिलसिला मांय सोमवार ने जयपुर रा सवाईमानसिंह मेडिकल कॉलेज मांय राख्यी ज्या जागरूकता कार्यक्रम मांय आ जाणकारी दीनी। वे बतायो के प्रदेश मांय हर साल करीब दस हजार मौतां सड़क हादसां रे कारण व्हे है। आं मांय ऊं दिमागी तौर ऊं मर्या करीब दस फीसदी लोगां रा अंग दान कर र केई मरीज़ां ने नुवी ज़िन्दगी मिल सके है। चिकित्सा शिक्षा सचिव कह्यो के जीवण रा असंतुलित तरीकां, हादसां अर जेनेटिक कारणां ऊं ऊपतू अंग लगावण री ज़रूरत बध रही है। ईं कारण स्वस्थ जीवनशैली अर संतुलित खान-पान ज़रूरी है। कार्यक्रम मांय अंगदान रा हलका मांय काम करण वाळी संस्थावां अर अंगदान करण वाळां रा पिरवार वाळां रो मान करी ज्यो।