प्रदेश रा न्यारा-न्यार हलकां ऊं मझला दर्जा री बिरखा रो दौर चाले। राज्य मांय लारला 24 घंटा मांय सब ऊं बत्ती 14 सेंटीमीटर बिरखा दौसा मांय दर्ज करी ज्यी। सिरोही रा रेवदर मांय 13 अर सवाईमाधोपुर रा चौथ का बरवाडा मांय 12 सेंटीमीटर पाणी बरस्यो। डीग मांय आज तेज़ बिरखा होवण ऊं सड़का माथे पाणी भरीज ग्यो। पाली मांय संवारां ऊं ई रूक-रूक ने बिरखा रो दौर चाले। नीम का थाना ज़िला मांय लारला दो दिनां रा तेज तावड़ां रे पछे बिरखा रो दौर सरू व्ह्यो। माउंट आबू समेत सिरोही जिला मांय आज चोखी बिरखा व्ही। ई बिरखा ऊं नदी-नाळां मांय पाणी री आवक तेज व्हे ग्यी है। अजमेर मांय तेज़ बिरखा रे पछे आनासागर मांय पाणी री आवक बधण ऊं झील रा सगळा गेट खोल ने पाणी री निकासी करी जाय री है। कोटा मांय लगातार बिरखा ऊं पाणी री आवक बधण ऊं आज कोटा बैराज रा दो गेट खोल ने पाणी री निकासी करी ज्यी। मौसम केन्द्र जयपुर मुजब कम दबाव रो तंत्र सक्रिय होवण ऊं राज्य रा दिखणाद अर अगूणी हलकां मांय आवता दो-तीन दिन भारी अर घणी भारी बिरखा होवण री करड़ी आस है। राज्य मांय भारी बिरखा री गतिविधियां मांय 28 अगस्त ऊं कमी आवण री आस है।