प्रदेश रा न्यारा-न्यारा हलकां मांय पारो उतरण ऊं ठारी रो असर बध ग्यो है। सिरोही ज़िला रा माउंट आबू मांय थावर ने तापमान ओजू जमाव बिन्दु ऊं नीचे उतर ग्यो। राजधानी जयपुर मांय ई पारो उतर र 9 दशमवल 4 डिग्री सेल्सियस नापी ज्यो। चित्तौडगढ़ मांय एक ही रात मांय पारो 8 डिग्री सेल्सियस उतर ग्यो। बाड़मेर, पाली अर सवाईमाधोपुर समेत केई ठोड़ां ठिठुरन अर गलन व्हे रही है। झुन्झुनू मांय मावठ व्हेवण ऊं किसानां ने चोखी साखां री आस है, पण कठे-कठे पालो पड़बा ऊं साखां ने नुकसान री ई शंका है। ईं बीचे मौसम केंद्र जयपुर आवता 48 घंटां रे दौरान शेखावाटी अर राज्य रा उतराद-आतूणी हलकां मांय कठे-कठे सीळो बायरो बाजण रा आसार जताया है। महकमो 26 जनवरी ने दोपहरां पाछे राज्य रा आतूणी अर उतराद हलकां मांय बिरखा रा आसार जताया है। 27 जनवरी ने जयपुर, जोधपुर, बीकानेर अर अजमेर समेत 6 संभागां मांय बादळां री गाज़ सागे बिरखा व्हेवण रा आसार है।