प्रदेश रा न्यारा-न्यारा जिलां मांय आज ई तेज बिरखा व्ही। अजमेर मांय संवारे 9 बज्यां ऊं व्हे रही बिरखा ऊं नीचला हलकां मांय पाणी भर ग्यो। टोंक मांय ई आज दोपहरां पाछे व्ही तेज़ बारिश ऊं ज़िंदगी माथे घणो असर पड़्यो। जिला रो मोटो बीसलपुर बंधो ई भर ग्यो है ज्यीं पाछे आज इण रा चार दरुजा खोल र बत्तो पाणी निकाळ्यो जा रह्यो है। जोधपुर जिला मांय केई ठौड़ां आज ई बिरखा व्ही। ज़िला मांय बिलाड़ा रा जसवंत सागर बंधा मांय लगातार पाणी आ रह्यो है। भीलवाड़ा जिला मांय ई आज आखा दिन मेह बरस्यो। जिला रा नदी नाळा मांय लगातार पाणी आ रह्यो है। राजसमंद जिला मांय कामलीघाट कने विरमगुड़ा मोड़ परां बरसाती नाळा मांय एक कार बह ग्यी। कार मांय सवार चार जणां ने पुलिस अर गांव वाळा मिल र हिफाजत सागे निकाळ लीना। मौसम विभाग रे मुजब प्रदेश रा घणखर हलकां मांय आवता 3-4 दिन तांई चौमासा री बिरखा चालती रेहवण रा आसार है। मौसम केंद्र जयपुर रे मुजब शुक्रवार अर थावर उदयपुर, अजमेर अर जयपुर संभाग रा कुछ हलकां मांय भारी अर घणी भारी बारिश रा आसार है। जोधपुर, बीकानेर, भरतपुर अर कोटा संभाग रा कुछ हलकां मांय ई बिरखा री संभावना है।