प्रदेश रा जयपुर संभाग अर लंकाऊ-ऊगणी ज़िलां मांय चौमासा री बिरखा व्हेवण लागी है। राज्य रा ऊगणी हलका रा केई ज़िलां मांय काल रात अर गुरूवार ने आखा दिन केई ठोड़ां ज़ोरदार मेह बरस्यो। राजधानी जयपुर रा केई हलकां मांय गुरूवार ने चोखो मेह बरस्यो। कोटा मांय आखा दिन रूक-रूक र बिरखा व्ही। भरतपुर मांय काल रात अर गुरूवार ने दिन मांय रूक-रूक र बिरखा व्ही। जिला मांय सब ऊं बत्ती 9 सेंटीमीटर बिरखा व्ही। बांसवाड़ा मांय कठे-कठे तेज़ तो कठे-कठे रिमझिम बिरखा रा समाचार है। जिला री छोटी सरवन पंचायत रा मकनपुर हलका मांय पाणी रा तेज बहाव मांय एक ट्रेक्टर बह ग्यो। ट्रेक्टर चलावण वाळा री हाल तांई ठा नी पड़ी है। झालावाड़ मांय केई ठोड़ां हल्की ऊं मझला दर्जा री बिरखा व्ही। हनुमानगढ मांय ई केई ठोड़ां तेज़ बिरखा व्ही। करौली, टोंक अर सवाईमाधोपुर ज़िलां मांय ई बारिश रा समाचार है। दूजी कानी प्रदेश रा उतराद-आतूणी हलकां मांय उमस भरी गर्मी रे कारण लोग बेहाल रह्या। मौसम विभाग गुरूवार ने जयपुर, अजमेर, नागौर, दौसा अर टोंक समेत केई ज़िलां मांय हल्की ऊं मझला दर्जा री बिरखा व्हेवण, बीजळी पड़बा अर ज़ोरदार अंधड़ सारू चेतायो है। मौसम केंद्र जयपुर रा निदेशक राधेश्याम शर्मा आकाशवाणी ने बतायो के आवता चार-पांच दिन ऊगणी ज़िलां मांय तेज़ बारिश व्हेवण रा आसार है।