प्रदेश रा घणखर हलकां मांय बिरखा रा दौर मंदो पड़्बा ऊं थोड़ो आराम मिल्यो है, हालांकि अधिकांश भागां मांय हल्की ऊं मझला दर्जा री बिरखा व्हे रही है। लारला 24 घंटा मांय डूंगरपुर ज़िला रा वेजा मांय ज़ोरदार मेह बरस्यो। बांसवाड़ा ज़िला रा कुशलगढ़ अर सज्जनगढ़ मांय मूलसलाधार बारिश व्ही। ज़िला रा केई नदी-नाळां मांय पाणी उफण रह्यो है। हलका री पुलिया माथे पाणी आवण 6 घंटा तांई आवण-जावण बंद रही । राजधानी जयपुर समेत केई ज़िलां मांय गुरूवार ने बादळा मण्ड्या रह्या। कठे-कठे हल्की बिरखा अर कठे-कठे छांटा-छिड़का रा समाचार है। मौसम केंद्र जयपुर रा निदेशक राधेश्याम शर्मा कह्यो के गुरूवार अर शुक्रवार ने हल्की ऊं मझला दर्जा री बिरखा रो दौर जारी रहवेला। वे बतायो के 30 अगस्त ऊं कुछ हलकां मांय ओजू तेज बिरखा सरू व्हेला।