प्रदेश रा घणखर हलकां मांय ज़ोरदार गर्मी पड़ रही है। राज्य रा आतूणी हलकां मांय पड़ रह्या ज़बरदस्त तावड़ा ऊं जिन्दगी माथे घणो असर पड़ रह्यो है। जैसलमेर अर बाड़मेर ज़िलां मांय गुरूवार आखा दिन उन्नो बायरो बाजतो रह्यो। चूरू मांय ई चिलचिलाती धूप रे कारण सड़कां सुनसान निजर आयी। अलवर मांय 8 वीं कक्षा तांई रा बच्चां सारू स्कूल रो बगत संवारे साढे सात ऊं साढे ग्यारह बज्यां तांई कर दियो ज्यो है। राज्य मांय गुरूवार ने सब ऊं बत्तो तापमान 44 दशमलव 8 डिग्री सेल्सियस बाड़मेर मांय दर्ज करी ज्यो। मौसम महकमा रे मुजब आवता दो-तीन दिन मांय पारो 2 ऊं 3 डिग्री सेल्सियस तांई और चढ़बा रा आसार है। शुक्रवार ऊं प्रदेश रा पाकिस्तान ऊं लागता हलकां मांय पारो 45 डिग्री सेल्सियस रे आरे-सारे पूग जावण री शंका है।