प्रदेश रा घणकरा जिलां मांय लारला 2-3 दिन सूं लगातार व्हे री बारिश सूं लोगां ने परेशानी रो सामनो करणो पड़ रह्यो है। राज्य रा केई जल स्त्रोत लबालब व्हे गया है। वठीने हाल भी पाणी री आवक लगातार जारी है। बीसलपुर बांध मांय पाणी री आवक लगातार बढ़ री है। रविवार सुंवारे बांध रा आठ गेटां सूं पाणी री निकासी सरू करी गई। राजधानी जयपुर मांय रविवार ने दोपहर पछे रुक-रुकर मेह बरस्यो। सवाईमाधोपुर मांय दोपहर पाछे तेज़ बरसात रो दौर चाल्यो। श्रीगंगानगर मांय घग्घर नदी रा बांध मांय कटाव होबा सूं केई खेतां मांय पाणी भर गयो। वठीने डूंगरपुर मांय खड़गदा गांव मांय मोरेन नदी री रपट माथे पाणी रो बहाव घणो तेज व्हे गयो। सलूम्बर रा डाया बांध मांय भी चादर चाल री है। सिरोही जिला मांय सुंवारे सूं रुक-रुकर बारिश व्हे री है।मौसम महकमो रविवार ने जालौर, सिरोही, बाड़मेर, बालोतरा, उदयपुर अर आरे-सारे री ठोड़ा मांय तेज हवावां रे सागे भारी सूं बहुत भारी अर एक-दो ठोड़ा घणकरी भारी बिरखा रो अंदाजो है। इण जिलां मांय सोमवार ने भी इण भांत रा हालात बण्या रह सके है। वठीने सवाईमाधोपुर मांय बत्ता पाणी सूं प्रभावित गांवां मांय मौसमी बीमारियां री रोकथाम खातर एन्टीलार्वा गतिविधियां अर फोगिंग करवाई जा री है।