प्रदेश रा घणकरां हलकां तांई मॉनसूनी बिरखा पूग ग्यी है। मौसम महकमो दीतवार ने राज्य रा अगुणी हलका मांय हळका ऊं मझला दर्जा री अर कोटा, उदयपुर अर भरतपुर संभाग मांय कठे-ई-कठे भारी बिरखा री आस जताई है। अगुणी राजस्थान मांय आवता दो दिनां मांय भारी बिरखा री गतिविधियां मांय बढवार रा आसार है। वठे ई काले कोटा, भरतपुर अर जयपुर संभाग मांय एक-दो ठोड़ां घणी भारी बिरखा होवण री आस है। लारला चौबीस घंटा मांय माउंटआबू मांय सब ऊं बत्ती 19 सेंटीमीटर पाणी बरस्यो। वठै ई भीलवाडा, चित्तौडगढ, राजसमंद, टोंक अर झालावाड मांय तेज बिरखा व्ही। ई बीचे दीतवार ने राजधानी जयपुर समेत न्यारी-न्यारी ठोडां चोखी बिरखा व्ही। पाली मांय कदे ई तेज तो कदे ई मझली बिरखा रो दौर चाल्यो। श्रीगंगानगर जिला रा पदमपुर, रत्तेवाला, मुकलावा अर जिला मांय केई ठोडां हळकी बिरखा व्ही। सवाईमाधोपुर मांय ई रिमझिम बिरखा ऊं मौसम सुहावणो बण्योडो है। म्हाणा बांसवाडा खबरनवीस बतायो के जिला मांय केई ठोडां व्हेरी बिरखा ऊं मौसम मांय ठण्डक घुळ ग्यी है। दीतवार होवण रे कारण दीतवार ने सैर-सपाटा री ठोडां चोखी रौनक निजर आई।