प्रदेश रा केई ज़िलां मांय लारली रात अर गुरूवार संवारा मावठ व्ही। केई ज़िलां मांय बादळ छायी ज्या रिया, वठे ई केई ठौड़ां घणा कोहरा रे कारण जिन्दगी माथे असर पड़्यो है। श्री गंगानगर अर हनुमानगढ़ मांय संवारा घणो कोहरा छायो रियो। सूरज रा दर्शन नी व्हेवण अर हल्का छाटा-छिडका रो दौर चालण ऊँ ठण्ड रो असर बध ग्यो। दौसा अर सवाईमाधोपुर रा केई हलका मांय गुरूवार ने ई मावठ व्ही। धौलपुर ज़िला मांय नुवा साल री सरूआत करड़ी ठण्ड रे साथै व्ही। संवारा सीळी हवां रे साथे कोहरो छायो रियो। कोटा जिला मांय गुरूवार ने मावठ होवण ऊँ मौसम रो मिज़ाज बदल ग्यो। जिला मांय केई ठौड़ां रिमझिम अर केई ठौड़ां मझला दर्जा री बिरखा व्ही। मौसम विभाग मेहकमों आवता दो-तीन दिन केई हलकां मांय घणो कोहरो छायो रहवण री आस जतायी है। मेहकमां गुरूवार ने केई ज़िला मांय हळका बिरखा अर आकाशीय बिजळी पडण सारू अलर्ट काड्यो है। मेहकमां रा निदेशक ने बताया के आवण वाळा दो-तीन दिन तापमान मांय कमी रा आसार है।