प्रदेश रा ऊगणी हलका मांय व्हे रही भारी बारिश रे कारण केई ठौड़ां ज़िन्दगी माथे घणो असर पड़्यो है। लारला 24 घंटां मांय प्रदेश री केई ठौड़ां हल्की ऊं मझला दर्जा री जद के कठे-कठे भारी ऊं घणी भारी बिरखा व्ही। जयपुर कने शाहपुरा मांय सब ऊं बत्तो 16 सेन्टीमीटर पाणी बरस्यो। कोटपूतली, पावटा, विराटनगर अर जमवारामगढ़ समेत केई ठौड़ां ई जम र मेह बरस्यो। भीलवाड़ा ज़िला रा मांडलगढ़ मांय 12 सेमीमीटर, टोंक ज़िला रा पीपलू मांय 11 सेंटीमीटर अर चूरू ज़िला रा रतनगढ़ मांय दस-दस सेंटीमीटर बरसात व्ही। जयपुर शहर मांय गुरूवार ने ई हल्की ऊं मझला दर्जा री बिरखा व्ही। प्रदेश रा ऊगणी हलकां मांय लारला दो-तीन दिन मांय व्ही ज़ोरदार बिरखा रे कारण चम्बल अर सहायक नदियां मांय पाणी उफण रह्यो है। करौली मांय चंबल नदी खतरा रा निशाण ने पार कर ग्यी है जद के धौलपुर मांय आ खतरा रा निशाण ऊं 13 मीटर ऊंची बह रही है। म्हाणा खबरनवीस बतायो के नीचला हलकां मांय पाणी भर जावण पाछे राहत अर बचाव रा कामां मांय फौज री मदद ली जा रही है। सवाईमाधोपुर मांय गुरूवार ने तेज़ बिरखा ऊं थोड़ी साता मिली, हालांकि हाल ई ज़िला मुख्यालय अर केई गांवां रा नीचला हलकां मांय पाणी भर्योड़ो है। ज़िला मुख्यालय अर केई गांवां बीचे संपर्क हाल ई बहाल नी व्हे सक्यो है। सवाईमाधोपुर अर मध्यप्रदेश ने जोड़बा वाळा गेला माथे हाल ई आवण-जावण सरू नी व्हे सकी है। गुरूवार ने चूरू, सीकर, अलवर, नागौर, अजमेर अर टोंक ज़िलां मांय केई ठौड़ां ज़ोरदार मेह बरस्यो। अलवर री ज़िला कलेक्टर अर्तिका शुक्ला लगातार व्हे रही बारिश ने ध्यान राखता थकां जनता ऊं तेज़ बहाव वाळा नदी-नाळां ऊं दूर रेहवण अर सावचेती राखण री अपील कीनी है। दौसा, बीकानेर, हनुमानगढ, कोटा, बूंदी, बारां, झालावाड़, पाली, सिरोही अर प्रतापगढ़ ज़िलां मांय हल्की ऊं मझला दर्जा री बिरखा रा समाचार है। तेज बारिश री शंका ने ध्यान राखता थकां केई ज़िलां री स्कूलां मांय काल ई छुट्टी रो ऐलाण कर दियो ज्यो है। मौसम विभाग गुरूवार ने जयपुर, झुंझुनू, सीकर, बीकानेर, चुरू अर नागौर ज़िला मांय ज़ोरदार बिरखा रो ऑरेंज अलर्ट जारी कीनो है। मौसम केंद्र जयपुर काल ई शेखावाटी अंचल अर बीकानेर संभाग मांय तेज़ बारिश रो दौर चालतो रेहवण रा आसार जताया है। थावर ऊं तेज़ बारिश रो दौर रूक जावण री संभावना है।