प्रदेश रा आधा ऊं बत्ता हिस्सां मांय चोखी बिरखा व्ही है। गुरूवार ने सब ऊं बत्ती 11-11 सेंटीमीटर बरसात बिजोलियां, फुलेरा, रामगंज मण्डी, दानपुर अर निम्बाहेड़ा मांय व्ही। बांसवाड़ा, बूंदी, बारां, करौली, झालावाड़, धौलपुर अर कोटा मांय ई कठे-कठे झमाझम बिरखा व्ही। प्रतापगढ़, चित्तौड़गढ़, सिरोही, भरतपुर अर अजमेर मांय ई केई ठौड़ां मूसलाधार बरसात रा समाचार है। म्हाणा भीलवाड़ा खबरनवीस बतायो के ज़िला मांय व्हे रही चौमासा री बरसात ऊं गर्मी ऊं साता मिली है। कोटा मांय ई शुक्रवार ने संवारे ऊं ई कदे रिमझिम तो कदे तेज़ बारिश रो दौर चाल रह्यो है। चौमासा री बिरखा सरू व्हेवण सागे ई बंधां मांय ई पाणी आवण लाग्यो है। भरतपुर अर सवाईमाधोपुर मांय ई व्हे रही चौखी बिरखा ऊं नदी-नाळा उफणबा लाग्या है अर नीचला हलकां मांय पाणी भर ग्यो है। करौली अर आरे-सारे रा हलकां मांय व्ही ज़ोरदार बारिश ऊं मौसम सुहावणो व्हे ग्यो है। सिरोही मांय ई शुक्रवार ने रिमझिम बिरखा व्ही। ईं बीचे राज्य रा ऊगणी हलका रे ऊपर शुक्रवार ने ई परिसंरचरण तंत्र बण्योड़ो है। मौसम विभाग रे मुजब शुक्रवार ने जयपुर, अजमेर, जोधपुर अर उदयपुर संभाग मांय कठे-कठे ज़ोरदार मेह व्हेवण रा आसार है। कोटा, भरतपुर अर बीकानेर संभाग मांय ई कठे-कठे बादळां री गाज सागे बारिश व्हेवण रा आसार है।