प्रदेश मांय ज़िला अर संभाग निरस्त करण रा मुद्दा माथे स्थगन प्रस्ताव रा बारा मांय बुधवार ने विधानसभा मांय हंगामो व्ह्यो। विपख रा सदस्यां रा शोर-शराबा ने ध्यान राखता थकां स्पीकर वासुदेव देवनानी सदन री कार्यवाही 15 मिनट सारू टाळ दीनी। कार्यवाही ओजू सरू व्हेवण परां ई विपख रा सदस्यां रो हंगामो चालतो रह्यो। बाद मांय श्री देवनानी कह्यो के विपख रा सदस्य काल ओ मामलो उठा सकेला। ईं पाछे सदन मांय मंत्री जवाब देवेला। सरकारी मुख्य सचेतक जोगेश्वर गर्ग खबरनवीसां सामी कह्यो के पैली वाळी गहलोत सरकार बिना तैयारी नुवा ज़िला बणावण रो ऐलाण कर दीनो हो, जदके मौजूदा राज्य सरकार सोच-समझ र वां ने निरस्त कीना है।