स्वामी विवेकानंद री जयंती ने राष्ट्रीय युवा दिवस रा रूप मांय मनायो जावे है। राष्ट्रीय युवा दिवस रे मौके राज्य स्तरीय महोत्सव जयपुर रा एसएमएस स्टेडियम मांय राख्यो गयो। मुख्यमंत्री भजनलाल शर्मा महोत्सव ने संबोधित करता थकां कया के युवा शक्ति हर युग मांय राष्ट्र री दिशा बदली है। इण मौके श्री शर्मा नई युवा नीति-2026, रोजगार नीति अर सरकारी भर्ती कैलेण्डर जारी करयो। इण रे सागे ही मुख्यमंत्री युवा स्वरोजगार योजना री सरूआत भी करी। वणा इण मौके युवावां ने यूथ आइकॉन अवॉर्ड सूं सम्मानित भी कर्या।
मुख्यमंत्री कया के नुवी नीति सूं मोट्यार मजबूत बणेला। वणा कया के स्वामी विवेकानंद भी मोट्यारा ने राष्ट्र बणावण खातर सेवा सूं जुड्बा ने कया हा। वणा कया के राज्य सरकार युवावां ने आगे बढाबा खातर हर भांत री कोशिश कर री है।
राष्ट्रीय युवा दिवस माथे प्रदेश रा दूजा जिलां मांय भी न्यारा-न्यारा कार्यक्रम व्हीया। राष्ट्रीय युवा दिवस माथे कोटा मांय व्हीया एक कार्यक्रम मांय राज्यपाल हरिभाऊ बागड़े कया के स्वामी विवेकानन्द व्यक्ति ने दृढ़ संकल्प कर निडरता सूं आगे बढ़बा री प्रेरणा दी। वे कया के स्वामी विवेकानन्द मोट्यारा ने संदेश दियो के वे आत्मविश्वास रे सागे जीवन मांय कोई भी लक्ष्य हासिल कर सके है। श्री बागड़े कया के जीवन मांय सकारात्मक विचार राखणो जरूरी है, विचार ही भविष्य रो निर्माण करे है। वणा इण मौके सामाजिक सेवा रा हलका मांय चोखा काम करबा वाळी कोटा री 31 संस्थावां ने सम्मानित कर्या।
राष्ट्रीय युवा दिवस रे मौके जोधपुर मांय रन फॉर स्वदेशी राखी गई। नया भारत का संकल्प-स्वदेशी और स्वावलम्बन थीम माथे राखी इण दौड़ ने जोधपुर सर्किट सूं शिक्षा अर पंचायतीराज मंत्री मदन दिलावर हरी झंडी दिखा र रवाना कर्या। रन फॉर स्वदेशी मांय जोधपुर शहर रा हज़ारां पढणियां इण मांय भाग लीना। इण मौके जोधपुर मांय जिला स्तरीय युवा संबल मेळो भी राख्यो गयो। मेळा मांय 20 न्यारा न्यारा हलकां री 70 सूं बत्ती कम्पनियां मोट्यारा ने रूजगार रा मौका दीना। बड़ी संख्या मांय मोट्यार इण मांय पंजीकरण करा र साक्षात्कार प्रक्रिया मांय भाग लीना। कार्यक्रम रे दौरान प्रभारी अर शिक्षा मंत्री मदन दिलावर न्यारी-न्यारी योजनावां रा लाभार्थियां ने प्रमाण पत्र अर इमदाद राशि रा चैक दीना। इण मौके युवावां सूं स्वरोजगार अर कौशल विकास योजनावां रो बत्ता ऊं बत्ता फायदो उठाबा ने कह्यो। कार्यक्रम मांय मुख्यमंत्री श्री शर्मा वीडियो कॉन्फ्रेंसिंग रे मार्फत मोट्यारा ऊं सीधी बातचीत करी। पाली मांय नौजवान स्वामी विवेकानंद री मूरत माथे फूल चढाया। सागे ही सड़क सुरक्षा री शपथ लीनी। वठी ने एक निजी कॉलेज मांय भाषण अर निबंध होड़ भी राख्यी गई। बाड़मेर मांय स्कूलां मांय केई कार्यक्रम व्हीया। भरतपुर अर सलूम्बर मांय स्वदेशी संकल्प दौड़ व्ही।