प्रदेश मांय सोमवार ने राजधानी जयपुर समेत केई ठौड़ां ऊँ बिरखा रा समाचार मिल्या। मौसम विभाग रे मुजब प्रदेश मांय कठे-कठे ओला पड़बा रा आसार है अर काश्तकारां ऊँ साखां अर अनाज ने भींजबा ऊँ बचावण सारू तुरत जतन करण री अपील करी ज्यी है। ईं बीचे लारला चौबीस घंटां मांय चित्तौड़गढ़, कोटा अर हनुमानगढ़ ज़िला मांय चोखो मेह बरस्यो। चित्तौड़गढ़ ज़िला रा भैंसरोड़गढ़ मांय सब ऊँ बत्तो दस सेंटीमीटर पाणी बरस्यो। म्हाणा खबरनवीस बतायो के हलका मांय लारला 2-3 दिन ऊँ व्हे री बिरखा रे कारण चौमासा री बिरखा ओजू सरू व्हे जावण रो एहसास व्हे रह्यो है। बाड़मेर अर श्रीगंगानगर ज़िलां मांय व्हे रही लगातार बारिश ऊँ पाक्योड़ी साखां ने नुकसाण व्हेवण री शंका है। भरतपुर मांय दोपहरां री बगत व्ह्या जोरदार मेह रे कारण नीचला हलका मांय पाणी भर ग्यो। झुन्झुनू ज़िला रा उदयपुरवाटी मांय व्ही ज़ोरदार बिरखा रे कारण कोट बंधा माथे चादर चाल ग्यी। आठ अक्टूबर पाछे बिरखा रूकण अर पारो तीन ऊँ पाँच डिग्री सेल्सियस तांई उतरण रा आसार है।