प्रदेश मांय सोमवार ने केई ठौड़ां मौसम रो मिजाज औचक ई बदल ग्यो। राजधानी जयपुर समेत केई हलकां मांय घणा बादळा मंड ग्या। मौसम केंद्र जयपुर रे मुजब राज्य मांय 22 ऊं 24 जनवरी बीचे जोधपुर, बीकानेर अर शेखावाटी हलकां मांय मावठ रा आसार है। महकमो ईं दौरान जयपुर अर भरतपुर संभाग मांय बिरखा रा आसार जताया है। मौसम विभाग रे मुजब आवता दो-तीन दिन तांई पारो थोड़ो चढेला, पण 22 जनवरी पाछे पारो ओजू उतरेला। प्रदेश रा कुछ हलकां मांय धुंअर रेहवण री ई संभावना है।