प्रदेश मांय सीळो बायरो बाजण अर धुंअर रेहवण ऊं जिन्दगी माथे असर पड़ रह्यो है। कोटा मांय एक ही दिन मांय पारो पौने नौ डिग्री सेल्सियस उतर जावण रे कारण ठारी और तेज़ पड़बा लागी है अर धुंअर रे कारण दूर तांई निजर नी आ रह्यो है। म्हाणा सवाईमाधोपुर खबरनवीस बतायो के दिन मांय बादळा मंड जावण अर सीळो बायरो बाजण ऊं वठे ई ठण्ड रो असर बध ग्यो है।
पाली, सिरोही, चित्तौड़गढ़, अजमेर अर सीकर मांय घणो सीळो बायरो बाजण लाग्यो है। मौसम विभाग रे मुजब आवता एक हफ्ता तांई राज्य मांय ज़ोरदार ठारी पड़बा रा आसार है जदके जयपुर संभाग मांय आवता तीन-चार दिन कोल्ड वेव रा आसार है। महकमो आवता दो-तीन दिन मांय पारो और उतरण सागे राज्य रा उतराद हलकां मांय शीतलहर चालण सारू चेतायो है। इण ने ध्यान राखता थकां हनुमानगढ़ मांय पहली ऊं 8वीं कक्षा तांई रा विद्यार्थियां सारू 10 जनवरी तांई छुट्टियां कर दीरी ज्यी है, हालाकि 9 ऊं 12वीं रा विद्यार्थियां सारू कक्षावां चालती रेहवेला। श्रीगंगानगर जिला मांय ई जिला कलेक्टर 5 वीं तांई रा विद्यार्थियां सारू 12 जनवरी तांई छुट्टी रो ऐलाण कर दीनो है, जदके छठी ऊं 12वीं कक्षा तांई रा विद्यार्थियां सारू स्कूल संवारे साढे़ 10 ऊं दोपहरां पाछे तीन बज्यां तांई खुलेला। डूंगरपुर मांय ई पहली ऊं 5वीं कक्षा तांई रा विद्यार्थियां अर आंगनबाड़ी केन्द्रां सारू 8 जनवरी तांई छुट्टियां रो ऐलाण करी ज्यो है।