प्रदेशभर मांय गुरूवार ने उं सहकार सदस्यता अभियान री सरूआत व्ही। मुख्यमंत्री भजनलाल शर्मा जयपुर रा कॉन्स्टीट्यूटशन क्लब उं ई अभियान रा शुभारंभ कार्यक्रम मांय बोलता कयो के सहकारिता उं समृद्धि फगत नारो नी है, सहकारिता काश्तकार री खुशहाली रो एक रस्तो है। वणां कयो के को-ऑपरेटिव री मार्फत राजस्थान रा गांव-गांव अर जन-जन मजबूत व्हे रिया है। 15 अक्टूबर तांई चालण वाळा ई अभियान रो मकसद को-ऑपरेटिव सहकारी हलका ने मजबूत बणावणो अर सहकार से सृमद्धि रा विजन ने साकार करणो है। ई अभियान रे तैत राज्य मांय 8 हजार 200 उं बत्ती पैक्स थर माथे शिविर लगाया जाएला, जिण मांय खास तौर उं पांच तरे री गतिविधियां व्हेला। ई मौके महिलावां अर नौजवानां ने सहकारी समितियां उं जोड़ण माथे खास ध्यान दियो जाएला। जिलां रा प्रभारी अहलकारां ने ई अभियान री मॉनिटरिंग करण रा निर्देश दीरिज्या है। बारां अर सवाईमाधोपुर जिला मांय सहकार सदस्यता अभियान रे तैत गुरूवार ने न्यारी-न्यारी शाखावं री समितियां मांय शिविर लगाई ज्या।