प्रदेश मांय व्हे री चौमासा री बिरखा ऊं नदी-नाळां मांय लगातार पाणी आ रह्यो है। लारला 24 घंटां मांय जालौर, झुंझुनूं, डूंगरपुर, टोंक अर राजधानी जयपुर समेत केई ठौड़ां हल्की ऊं मझला दर्जा री बरसात दर्ज करी ज्यी। प्रदेश रा आतूणी हलका मांय कठे-कठे ज़ोरदार मेह बरस्यो। जैसलमेर ज़िला रा पोकरण मांय सब ऊं बत्ती 13 सेंटीमीटर बिरखा व्ही। ईं बीचे, मौसम विभाग शुक्रवार ने कोटा अर उदयपुर मांय कठे-कठे ज़ोरदार बायरो बाजण सागे भारी ऊं घणी भारी बिरखा व्हेवण रा आसार जताया है। कोटा, अजमेर, उदयपुर, जयपुर अर भरतपुर संभाग मांय आवता तीन-चार दिन चौखी बिरखा व्हेवण रा आसार है।