प्रदेश मांय व्हे रही चौमासा री बिरखा बीचे दीतवार ने श्रीगंगानगर मांय दोपहरां पाछे ज़ोरदार बायरो बाजण सागे मेह व्ह्यो। भरतपुर अर डीग मांय ई दोपहरां पाछे तेज़ बारिश व्ही। उदयपुर, जालौर अर सिरोही मांय ई दीतवार ने ज़ोरदार मेह बरस्यो। राजधानी जयपुर मांय ई हल्की बिरखा व्ही। कोटपूतली-बहरोड़ हलका री फौजावाली ढाणी मांय बीजळी पड़ जावण ऊं एक जणा री मौत व्हे ग्यी। टोंक ज़िला रा देवली .मांय दोस्तां सागे गोठ मणावण ग्या जयपुर ज़िला रा कालाडेरा रा रहवासी एक जणा री बनास नदी मांय डूब जावण ऊं मौत व्हे ग्यी। मौसम केन्द्र जयपुर रे मुजब काल कोटा, उदयपुर, भरतपुर, अजमेर अर जयपुर संभाग मांय बिरखा रा आसार है। जोधपुर अर बीकानेर संभाग मांय ई बारिश रा आसार है। महकमो जयपुर, भरतपुर, कोटा अर उदयपुर संभाग मांय 2 ऊं 6 जुलाई बीचे कठे-कठे भारी बारिश अर कठे-कठे घणी भारी बारिश री संभावना जतायी है।