प्रदेश मांय व्हे रही चोखी बिरखा ऊं तळाव-बंधा 71 फीसदी ऊं बत्ता भर ग्या है। छोटा-मोटा कुल 693 बंधा मांय ऊं 196 पूरा जद के 351 बंधा थोड़ा-घणा भर ग्या है। ईं बीचे मौसम विभाग थावर ने कोटा अर उदयपुर मांय कठे-कठे भारी ऊं घणी भारी बरसात रा आसार जताया है। अजमेर, जोधपुर, भरतपुर अर जयपुर संभाग रा कुछ हलका मांय ई ज़ोरदार मेह बरसबा री संभावना है। आवता दो दिन राज्य रा लंकाऊ-ऊगणी अर ऊगणी हलका मांय कठे-कठे घणी ज़ोरदार बिरखा रा आसार है। थावर ने अजमेर मांय संवारे ऊं ई कदे मंदी तो कदे तेज़ बारिश व्ही। भीलवाड़ा मांय ई तड़के ई रिमझिम बारिश सरू व्हे ग्यी। बीती रात राजधानी जयपुर मांय ई झमाझम मेह बरस्यो। सिरोही ज़िला मांय मौसम सुहावणो बण्योड़ो है। म्हाणा खबरनवीस बतायो के माउंट आबू मांय मोटी तादाद मांय आया सैलाणी धुंध भरी वादियां अर मनोहारी नजारां रो आनन्द ले रह्या है। चोखी बिरखा ऊं पाली रा जवाई अर सरदारसमंद बंधा लबालब भर ग्या है। थावर ने हेमावास बंधा रे ई पूरो भर्यां पाछे गांवा वाळा तिलक लगा र अर चुनरी ओढ़ा र पूजन कीनो।