प्रदेश मांय विकसित राजस्थान 2047 रा विज़न डॉक्यूमेंट ने मंजूरी दे दीरीजी है। ईं सागे ई राज्य ने ग्रीन एनर्जी हब बणावण सारू ई रोडमैप तैयार करी ज्यो है। मुख्यमंत्री भजन लाल शर्मा री सदारत मांय व्ही मीटिंग मांय अ फैसला करी ज्या। मीटिंग मांय करी ज्या फैसलां री जाणकारी देता थकां उद्योग मंत्री राज्यवर्द्धन सिंह राठौड़ बतायो के विजन डॉक्यूमेंट मांय सैर-सपाटा, खेती-बाड़ी अर भणाई-लिखाई समेत 13 हलकां माथे खास ध्यान दियो ज्यो है। मीटिंग मांय अक्षय ऊर्जा ऊं जुड़्या 10 प्रस्तावां ने मंजूरी दीरीजी। ईं सागे ई जयपुर मांय विश्व स्तर रो कन्वेंशन सेन्टर बणावण अर डोढ़ सौ करोड़ रूप्या रा खर्च वाळी विश्वकर्मा युवा उद्यमी प्रोत्साहन योजना समेत केई प्रस्ताव मंजूर करी ज्या। पत्रकारां ने मंत्री जोगाराम पटेल अर बाबूलाल खराड़ी ई मीटिंग मांय करी ज्या फैसला रा बारा मांय जाणकारी दीनी।