प्रदेश मांय लारला कुछ दिनां सूं हो री गतिविधियां मांय दीतवार ने थोड़ी कमी निजर आई। वठिने बित्यां चौबीस घंटा मांय राज्य मांय सब सूं बत्ती 14 सेंटीमीटर बिरखा माउंट आबू मांय दरज करीजी। जोधपुर रा ओसिया मांय 10, बाड़मेर अर जालौर ज़िला रा सायला मांय 8-8, जैसलमेर, पाली, नागौर रा खींवसर अर जोधपुर रा शेरगढ में 7-7 सेंटीमीटर पाणी बरस्यो। पाली मांय दीतवार ने सुवांरे सूं बादळ छायोड़ा रिया अर दुपहरा पाछे रिमझिम बिरखा सूं मौसम सुहावणो व्हे गयो। वठिने लारला दिनां व्ही बढ़िया बरसात सूं बाधां मांय चौखी आवक होणे सूं 15 बांध लबालब हो गया। दीतवार ने रविवार छुट्टी रो दिन होणे सूं हेमावास बांध अर गोरमघाट समेत न्यारा-न्यारा पर्यटक स्थलां माथे घणी तादाद मांय लोग पिकनिक मनावण तांई पहुंचया। अजमेर मांय लारला दो दिनां सूं व्ही तेज बिरखा रे पाछे दीतवार ने बरसात रूकणे अर धूप खिलने सूं लोगां राहत ली। मौसम केन्द्र जयपुर रे मुजब आवता दो दिनां तांई उत्तरी अर दक्षिण-पूर्वी राजस्थान रा कुछएक हळकां मांय हल्की सूं मध्यम बिरखा होणे री आसा है। वठिने प्रदेश री घणखर ठौड़ां मांय आगले एक सप्ताह तांई भारी बिरखा री गतिविधियां मांय कमी आवेली।