प्रदेश मांय लगाया जा रह्या शहरी अर ग्रामीण सेवा शिविरां मांय लोगां री समस्यावां सुलझाई जा रही है। मुख्यमंत्री भजन लाल शर्मा जयपुर मांय राख्यी ज्या शहरी सेवा शिविर रो दौरो कीनो। वां सागे भाजपा रा नेता अशोक परनामी अर जनता रा केई नुमाइन्दा मौजूद हा। ईं मौके मुख्यमंत्री जनता ऊं आं शिविरां रे ज़रिए न्यारा-नयारा सरकारी सुबीतां रो फ़ायदो लेवण री अपील कीनी। संसदीय कार्य मंत्री जोगाराम पटेल गुरूवार ने जोधपुर री बड़ली ग्राम पंचायत मांय लगायी ज्या ग्रामीण सेवा शिविर रो दौरो कीनो। वे बतायो के आं शिविरां मांय मूल निवास अर जाति प्रमाण-पत्र जारी करण, स्वामित्व पट्टा बणावण, किसान गिरदावरी एप रे जरिये गिरदावरी, सामाजिक सुरक्षा पेंशन अर पालनहार सरीखी योजनावां ऊँ जुड़्या मामला निपटाया जा रह्या है। श्री पटेल अहलकारां ने किसान रजिस्ट्री अर एनएफएसए ई-केवाईसी रा लक्ष्य पूरा करण रा हुकम दीना। शिविर मांय मंगला पशु बीमा पॉलिसी अर पोषण किट ईं बाटी ज्या। पाली मांय शहरी सेवा शिविर रा तैत आज नगर निगम मांय पीएम अर मुख्यमंत्री स्वनिधि योजना रा सांकेतिक चैक बांटी ज्या।