प्रदेश मांय मौसमी बीमारियां रा बधता मामलां माथे काबू करण सारू असरदार कार्यवाही करण रा हुकम दिया ज्या है। राज्य सरकार सगळा जिला कलेक्टर अर चिकित्सा अधिकारियां ने मरीजां री सार संभाल करण रा हुकम ई दीना है। अस्पतालां मांय आज-काल मोटी तादाद मांय डेंगू अर वायरल बुखार रा मामला आ रह्या है। लारला दस दिन मांय राज्य मांय डेंगू रा करीब एक हजार मामला सामी आ चुक्या है जद के आखा साल मांय हाल तांई करीब साढे 6 हजार मरीज़ां मांय डेंगू री बीमारी री ठा पड़ी है। लारला चार सप्ताह मांय डेंगू रा मामला री तादाद मांय लगातार बधोतरी व्ही है। जयपुर शहर रा केई हलकां मांय डेंगू रो कोप है। उदयपुर, बीकानेर, टोंक, अलवर अर दौसा मांय ई मोटी तादाद मांय डेंगू रा मामला सामी आ रह्या है। मलेरिया अर स्क्रब टाइफस रा मरीज ई मोटी तादाद मांय अस्पताल पूग रह्या है। स्क्रब टाइफस रा बत्ता मामला उदयपुर, अलवर, राजसमंद अर झालावाड़ ज़िला मांय सामी आ रह्या है। जयपुर रा सवाई मानसिंह मेडिकल कॉलेज मांय मेडिसिन विभाग रा वरिष्ठ आचार्य डॉ. प्रकाश केसवानी आकाशवाणी ने बतायो के ई दफ़ा बार वायरल बुखार रा लक्षण मांय बदलाव आयो है।