प्रदेश मांय भीषण गर्मी अर लू बीचे शुक्रवार ने श्रीगंगानगर मांय पारो 49 डिग्री सेल्सियस ने पार कर ग्यो ज्यो लारला 35 साल मांय सब ऊं बत्तो है। चूरू मांय ईं अधिकतम तापमान 47 डिग्री सेल्सियस ऊं ऊंचो दर्ज करी ज्यो। दूजी कानी तेज़ तपन बीचे केई ठौड़ां मौसम पलट ग्यो। दोपहरां पाछे झुंझुनूं कोटपूतली-बहरोड़, भरतपुर अर बारां मांय आंधी चालण पाछे बिरखा व्हेवण ऊं मौसम खुशनुमा व्हे ग्यो। राजधानी जयपुर मांय ई बादळां री आवा-जाही रही। मौसम विभाग शुक्रवार ने केई ठोड़ां ज़ोरदार बायरो बाजण सागे बिरखा व्हेवण सारू चेतायो है। जयपुर, भरतपुर, बारां, झालावाड़ अर सीकर ज़िलां मांय कठे-कठे हल्की ऊं मझला दर्जा री, जदके अलवर, चूरू, अजमेर, दौसा, करौली, धौलपुर अर कोटा समेत कठे-कठे हल्की बिरखा रा आसार है। ईं बीचे राज्य मांय काल चौमासा ऊं पैली रा छांटा-छिड़का रो दौर सरू व्हेवण री संभावना है। मौसम केन्द्र जयपुर रा निदेशक राधेश्याम शर्मा बतायो के कोटा अर उदयपुर संभाग मांय इण री सरूआत व्हे सके है, जिण रे धीरे-धीरे आगे बढ़ता थकां 20 जून तांई जयपुर अर भरतपुर संभाग तांई पूगण रा आसार है।