प्रदेश मांय बुधवार ऊँ ग्रामीण अर शहरी सेवा शिविर सरू कर्या जावेला। आं रो मकसद जनता री समस्यावां रो बेगो निपटारो अर जरूरी सेवावां एक ही ठौड़ मुहैया करावणो है। शहरी सेवा शिविरां रे मार्फत राईजिंग राजस्थान निवेशक सम्मेलन मांय मिल्या निवेश प्रस्तावां सारू ज़मीं तैय कर र वां री मंजूरी देवण, अटल पेंशन योजना, प्रधानमंत्री सुरक्षा बीमा योजना, वृद्धावस्था, विधवा अर विकलांग पेंशन ऊँ जुड़्या काम निपटाया जावेला। पीएम अर सीएम स्वनिधि योजना रा तैत अर्जियां लेवण अर जूना मामलां रा कर्ज देवण रा काम ई कर्या जावेला। ईं रे अलावा सफाई व्यवस्था मांय सुधार, नाळयां री मरम्मत, प्रकाश व्यवस्था, गाड़ियां ऊबी करण री ठौड़ तैय करण, लीज़ होल्ड अर फ्री होल्ड पट्टा जारी करण समेत केई काम कर्या जावेला। ग्रामीण सेवा शिविरां रे ज़रिए ई न्यारी-न्यारी सरकारी योजनावां रो फायदो लेवण सारू अर्जियां ने मंजूरी देवण रा काम ई कर्या जावेला। ईं सागे ई गेला खोलण, स्वामित्व पट्टा बणावण, गिरदावरी करावण, टूटी-फूटी स्कूलां अर आंगनबाड़ी केन्द्रां रा सुधार समेत न्यारा-न्यारा काम कर्या जावेला।