प्रदेश मांय पहली दफ़ा एके सागे सात ई संभाग मुख्यालयां माथे बुधवार ने घूमर फेस्टिवल राख्यी ज्यो है। राज्य स्तर रो कार्यक्रम जयपुर रा विद्याधर स्टेडियम मांय व्ह्यो। उपमुख्यमंत्री दिया कुमारी ई ईं कार्यक्रम मांय शामिल व्ही। कार्यक्रम मांय पारम्परिक लोक संस्कृति अर नाच-गाण री प्रस्तुतियां दीरीजी। अजमेर रा सरकारी पृथ्वीराज कॉलेज मांय जिला प्रशासन अर पर्यटन विभाग री ओर ऊँ घूमर उत्सव धूमधाम ऊँ मणायी ज्यो। ईं कार्यक्रम मांय मोटी तादाद मांय महिलावां राजस्थानी पहराव पहर र शामिल व्ही। जोधपुर मांय राजकीय उम्मेद स्टेडियम मांय अर कोटा मांय चम्बल रिवर फ्रंट माथे ओ आयोजन राख्यी ज्यो। प्रदेश रा सांस्कृतिक गौरव री निशाणी घूमर ने दुनिया भर मांय पिछाण दिरावण अर नुवी पीढ़ी ने प्रदेश रा सांस्कृतिक मॉडल ऊं जोड़बा सारु ओ उत्सव राख्यी ज्यो।