प्रदेश मांय न्यारी-न्यारी ठौड़ां दीतवार ने ई बिरखा रा दौर चालतो रियो। पाली ज़िला मांय केई ठौड़ां जोरदार बिरखा व्ही। धौलपुर ज़िला मांय व्हे री बिरखा ऊं सरमथुरा रा आंगई बंधा मांय पाणी री तेज़ आवक व्हे री है। बंधा रा 6 गेट खोल ने पाणी री निकासी करी जाय री है। सिरोही ज़िला मांय माउंटआबू समेत न्यारी-न्यारी ठौड़ां तेज बिरखा व्ही। बांसवाड़ा ज़िला मांय भारी बिरखा सारू चेताया जावण ने देखता ज़िला प्रशासन काले अर परसु दो दिन आंगनबाड़ी केन्द्रा अर कक्षा 1 ऊं 12 वीं तांई रा सरकारी अर गैर सरकारी स्कूलां मांय छुट्टी ऐलाण करी है। बांरा अर भीलवाड़ा अर डूंगरपुर ज़िला मांय ई भारी बिरखा ने देखता आवता दो दिन स्कूला मांय छुट्टी ऐलाण करी ज्यी है। मौसम मेहकमों काले भरतपुर, कोटा अर उदयपुर संभाग मांय कठेई-कठेई भारी बिरखा होवण रो अंदाजो जतायो है। मेहकमा मुजब जयपुर, अजमेर अर जोधपुर संभाग मांय कठेई-कठई भारी बिरखा व्हे सके। मौसम मेहकमों लोगां ने बिरखा री बगत पाणी भराव हलकां मांय बिजळी रा खम्भां ऊं दूरी बणा र राखण अर सावचेती ऊं वाहन चलावण सारू सुझाया है।