प्रदेश मांय दीतवार ने उप-राष्ट्रीय पल्स पोलियो अभियान चलायो जावेला। ईं रा तैत पांच साल तांई रा एक करोड़ ऊं बत्ता बच्चां ने पोलियो री बीमारी ऊं बचाव री दवा पावणो तैय करी ज्यो है। अभियान सारू पूरा राज्य मांय 58 हजार 823 पोलियो बूथ बणायी ज्या है। ईं सागे ई 6 हजार ऊं बत्ती हलती-चलती टीमां अर आठ हजार ऊं बत्ती मोबाइल टीम बणायी ज्यी है, जो दवा नी पी सक्या बच्चां ने आवता दो दिन तांई आ दवा पिलावेला। उप राष्ट्रीय पल्स पोलियो अभियान रा बारा मांय जाग जगावण सारू राज्य मांय दीतवार ने न्यारा-न्यारा कार्यक्रम राख्यी ज्या। पाली मांय पाँच साल तांई रा बच्चां ने काल पोलियो ऊं बचाव री दवा पावण री अरज करता थकां राजकीय बांगड़ अस्पताल ऊं जागरूकता रैली निकाळी ज्यी। बालोतरा मांय ई जन-जागरुकता रैली निकाळ र लोगां ऊं काल पोलियो बूथ माथे जा र बच्चां ने आ खुराक पावण री अपील करीजी अर ईं पाछे आवता दो दिन तांई घर-घर जा र पोलियो ऊं बचाव री खुराक पावण रा बारा मांय जाणकारी दीरीजी। भरतपुर रा एसडीएम राहुल सैनी बतायो के अभियान रा तैत ज़िला रा 2 लाख 8 हजार ऊं बत्ता बच्चां ने पोलियो ऊं बचाव री दवा री खुराक पावणो तैय करी ज्यो है।