प्रदेश मांय तीन न्यारी-न्यारी ठौड़ां व्ह्या हादसा मांय सात लोगां री मौत व्हे ग्यी। दिल्ली-मुम्बई एक्सप्रेस-वे माथे कोटा ज़िला मांय कार अर टैम्पो री टक्कर मांय चार लोगां री मौत व्हे ग्यी। इण हादसा मांय छह लोग घायल व्हे ग्या। पुलिस रे मुजब ये लोग करौली रा रहवासी हा। अर इन्दौर सू एक कार्यक्रम मांय शामिल व्हे र लौटता टेम हादसा रा शिकार व्हे ग्या। वठिने पाली मांय दीतवार ने सूंवारे बाली-मुंडारा मार्ग माथे एक मोटरसाइकिल रे बेकाबू हो र पलटबा सूं एक महिला री मौत व्हे ग्यी अर दो लोग गंभीर रूप ऊं घायल व्हे ग्या। घायलां ने इलाज खातर जोधपुर रैफर कर्यो ग्यो है। वठिने भीलवाड़ा ज़िला रा बडला पंचायत हलका मांय बकरियां चराबा गया दो भाईयां री बरसाती नाळा मांय डूबबा सूं मौत व्हे ग्यी। कोटा मांय व्ह्या भीषण सड़क हादसां ने ले र राज्यपाल हरिभाऊ बागडे दुःख जतायो है। वठिने मुख्यमंत्री भजन लाल शर्मा सोशल मीडिया संदेश मांय कह्या के दिल्ली-मुम्बई एक्सप्रेस-वे माथे व्ही दुर्घटना मांय जनहानि री सूचना बेहद दुःख पूर्ण है। वणा जिला प्रशासन ने घायलां रो चौखो इलाज करबा रा निर्देश दिया।