प्रधानमंत्री नरेंद्र मोदी जीएसटी बचत उत्सव री घोषणा करी ही। 22 सितम्बर सूं सरू व्हीयो ओ उत्सव समाज रा सगळा तबकां ने फायदो दे रह्यो है। जीएसटी सुधार भारत री अप्रत्यक्ष कर प्रणाली ने सरल बणाणे री दिशा मांय एक खास कदम है। आं सुधारां सूं चीजां अर सेवावां माथे टैक्स कम व्हीयो है अर लोग इण रो फायदो ले रिया है। इण री इण कडी मांय प्रदेश मांय न्यारा न्यारा ठोडां जीएसटी बचत उत्सव रे मार्फत जनता ने जागरूक करयो जा रह्यो है। थावर ने पाली मांय वाणिज्य कर महकमा री कानी सूं जागरूकता कार्यक्रम राख्या गया। इण रे चालता चौराहां माथे पोस्टर बैनर लगाया गया अर रैली निकाळी ज्यी। वठी ने सवाईमाधोपुर मांय केंद्रीय संचार ब्यूरो, क्षेत्रीय कार्यालय कानी सूं डूंगरी मांय खास स्वच्छता ही सेवा अर जीएसटी सुधार बचत उत्सव माथे खास जागरूकता कार्यक्रम राख्या गया। इण कार्यक्रम मांय स्वच्छता ही सेवा अभियान, केंद्र सरकार री न्यारी न्यारी जनकल्याणकारी योजनावां माथे चर्चा करता थकां जीएसटी बचत उत्सव रा बारा मांय विस्तार सूं जाणकारी दी। कार्यक्रम री सरूआत मांय स्कूली टाबर स्वच्छता रो संदेश देता व्हीया रैली भी निकाळी। इण मौके माथे स्थानीय जनप्रतिनिधि अर न्यारा न्यारा महकमा रा अहलकार, कर्मचारियां रे साथे स्थानीय लोग भी मौजूद रिया। जैसलमेर मांय जीएसटी बचत उत्सव अभियान रे तैत शहर रा व्यापारियां अर उपभोक्तावां ने जीएसटी सुधारां रा बारा मांय जाणकारी दी जा रही है। उच्छव मांय जनप्रतिनिधि अर अहलकार भी आप आप री सहभागिता निभा रिया है। सिरोही मांय जीएसटी बचत उत्सव रे तैत जनजागरण अभियान चलायो जा रियो है।