प्रदेश मांय जनता री परेशानियां बेगी दूर करण रा मकसद ऊं न्यारी-न्यारी ठोडां अहलकार जनसुणवाई कर रह्या है। नीमकाथाना मांय राख्यी ज्यी जनसुणवाई मांय आला अहलकार जनता री समस्यावां सुणी अर कुछ रो मौके ई निपटारो कीनो। जैसलमेर मांय राख्यी ज्यी जनसुणवाई मांय जिला कलेक्टर प्रताप सिंह जनता री समस्यावां सुणी अर अहलकारां ने वां रा बेगा निपटारा रा हुकम दीना। बालोतरा मांय राख्यी ज्यी जनसुणवाई मांय बिजली-पाणी अर दूजां मुद्दा ऊं जुड़्या 59 मामला आया। जिला कलेक्टर सुशील कुमार यादव एक-एक शिकायत सुण र अहलकारां ने जरूरी हुकम दीना। करौली मांय राख्यी ज्यी जनसुणवाई मांय जिला कलेक्टर नीलाभ सक्सेना अहलकारां ने जनता री शिकायतां रा बेगा निपटारा री व्यवस्था करावण रा हुकम दीना। बाड़मेर मांय ज़िला कलेक्टर टीना डाबी 140 शिकायतां री सुणवाई कीनी। चित्तौड़गढ़ मांय जिला कलक्टर आलोक रंजन गैर कानूनी कब्जा हटावण, पट्टा, साफ-सफाई अर बिजली-पाणी समेत न्यारा-न्यारा मामलां मांय 40 शिकायतां री सुणवाई कीनी। झालावाड़ मांय जिला कलेक्टर अजय सिंह राठौड़ अर केकड़ी मांय जिला कलक्टर श्वेता चौहान जनसुणवाई कीनी। ईं बीचे प्रदेश मांय आवता महीना लगायी जावण वाळी चौथी राष्ट्रीय लोक अदालत री जाणकारी देवण रा मकसद ऊं गुरूवार ने डीग रा लाला मनोहर लाल खंडेलवाल राजकीय बालिका उच्च माध्यमिक विद्यालय मांय विधिक शिविर लगायी ज्यो। पैनल रा वकील राजेंद्र शर्मा बतायो के ईं दौरान विद्यार्थियां ने बाल यौन उत्पीड़न, बाल तस्करी अर बाल श्रम रा विधिक प्रावधानां रा बारा मांय विगतवार जाणकारी दीरीजी। दूजी कानी लोक अदालत री तारीख 14 दिसंबर ऊं बदल र 22 दिसंबर कर दीरीजी है। चित्तौड़गढ़ जिला विधिक सेवा प्राधिकरण रा सचिव सुनील कुमार गोयल आ जाणकारी दीनी।
000