प्रदेश मांय चौमासा री बिरखा मांय थोड़ी कमी आयी है, हालांकि केई ठौड़ां हल्की बरसात व्हे रही है। लारला चौबीस घंटां मांय सिरोही, राजसमंद, पाली अर झालावाड़ मांय एक-एक सेंटीमीटर पाणी बरस्यो। मौसम विभाग मंगलवार ने अलवर, चित्तौड़गढ़, प्रतापगढ़ अर झालावाड़ ज़िलां मांय गरज सागे मेह व्हेवण रो येलो अलर्ट जारी कीनो है। आवता दो दिन जोधपुर संभाग रे अलावा दूजा संभागां मांय कठे-कठे गरज सागे हल्की ऊं मझला दर्जा री बिरखा व्हेवण रा आसार है। राज्य मांय कठे-कठे हल्की ऊं मझला दर्जा री बरसात रो सिलसिलो 26 जुलाई तांई चालतो रेहवण रा आसार है। ईं पाछे 27 ऊं 30 जुलाई बीचे भारी बारिश रो दौर ओजू सरू व्हेवण रा आसार है। ईं दौरान कोटा संभाग मांय कठे-कठे भारी ऊं घणी भारी बिरखा री संभावना है।
ईं बीचे, भरतपुर मांय लारला दिनां व्ह्या ज़ोरदार मेह पाछे शहर रा न्यारा-नयारा हलकां मांय पाणी भर ग्यो है। इण ने निकाळबा सारु भरतपुर विकास प्राधिकरण जनता री मदद बाबत् क्यूआर कोड जारी कीनो है। क्यूआर कोड रे ज़रिए पाणी भरण ऊं जुड़ी जाणकारी आसानी ऊं अहलकारां ने दी जा सकेला।