प्रदेश मांय चौमासा पैली री बारिश होबा सूं लोगां ने तेज गर्मी अर लू सूं राहत मिली। दीतवार ने केई जिला मांय मेह बरसबा सूं तापमान मांय गिरावट आई। घणखरां जिलां मांय दीतवार ने बत्तो तापमान 35 सूं 40 डिग्री सेल्सियस रे बीच दरज कर्यो गयो, जो सामान्य सूं 5 सूं 6 डिग्री तांई कम है। अजमेर मांय दोपहर पाछे मौसम मांय अचाणचक आया बदळाव रे पछे आई बारिश शहर ने तर-बतर कर दीनो। पाली जिला रा सादड़ी, देसूरी अर नारलाई मांय कठे-कठे घटाटोप मेह बरस्यो। म्हाका खबरनवीस रे मुजब इण सूं लोगां ने गर्मी सूं राहत मिली है। राजधानी जयपुर, दौसा अर ऊगणां जिला मांय भी दोपहर पाछे मेह बरसबा सूं मौसम सुहावणो व्हे ग्यो। मौसम महकमा रे मुजब उदयपुर, जोधपुर, बीकानेर, अजमेर, कोटा, जयपुर अर भरतपुर संभाग रा कुछेक हिस्सां मांय सोमवार ने भी बादल गरजबा रे सागे मेह बरस सके है। मौसम महकमो उदयपुर अर जोधपुर संभाग मांय कठे-कठे मेह बरसबा री संभावना जताई है। वठी ने 20 जून सूं मेह बरसबा रा दौर रो दायरो बढ सके है। केन्द्र रे मुजब उत्तर-पश्चिमी राजस्थान अर आरे-सारे रा हलका अर 21 जिला मांय आंधी अर बारिश जारी रह सके है।