प्रदेश मांय चलाया जा रिया वंदे गंगा जल संरक्षण-जन अभियान री प्रगति ने लेर दीतवार ने न्यारा-न्यारा ज़िलां मांय समीक्षा बैठकां राखी गई। इण ई कड़ी मांय उपमुख्यमंत्री डॉ. प्रेमचंद बैरवा उदयपुर मांय अहलकारां री बैठक ली। उपमुख्यमंत्री अभियान मांय उदयपुर री उपलब्धियां री सराहना करता थकां पूरी टीम ने बधाई दी। डॉ. बैरवा कया के वंदे गंगा अभियान केवल एक आयोजन नीं, बल्कि इण ने जीवन रो अभिन्न हिस्सो बणाणो व्हेला। राजस्व अर उपनिवेश विभाग रा मंत्री हेमंत मीणा प्रतापगढ जिला मांय वंदे गंगा जल संरक्षण जन अभियान अर बजट घोषणावां बाबत समीक्षात्मक चर्चा करी। वणा अहलकारां सूं जल स्त्रोतां री मरम्मत टेम माथे कराबा अर जलाशयां मायं जमी गाद ने हटाबा ने कया। संसदीय कार्य मंत्री जोगाराम पटेल लूणी रा सरेचा मांय राख्या कार्यक्रम मांय शिरकत करी। वणा लोगां सूं कूआं-बावड़ी, अर तलाइयां ने सहेज र राखबा ने कया। डूंगरपुर मांय प्रभारी मंत्री बाबूलाल खराड़ी अहलकारां री बैठक लेर अभियान री प्र्रगति री समीक्षा करी। बालोतरा मांय गृह राज्यमंत्री जवाहर सिंह बेढम अभियान री प्रगति रो जायजो कर्यो। वणा मीडिया सूं बातचीत मांय कया के सगळा ने मिलर परम्परागत जल स्त्रोतां ने बचाणो चाहिजे। इण बीच, प्रदेशभर मांय दीतवार ने भी अभियान रे तैत केई गतिविधियां राख्यी गईं। जयपुर मांय सांसद मंजू शर्मा री अगुवाई मांय जनप्रतिनिधि अर भाजपा कार्यकर्ता रामगढ बांध माथे श्रमदान कर र मिट्टी काढी। कैबिनेट मंत्री अविनाश गहलोत झुंझुनूं जिला रा नवलगढ़ मांय अभियान मांय शामिल व्हे र जल स्त्रोतां रो पूजन कर्यो। इण मौके श्री गहलोत कया के ओ अभियान जन आंदोलन बण ग्या है। जल संसाधन मंत्री सुरेश सिंह रावत भरतपुर मांय जल संरक्षण रा कामां रो जायजो लेर अधिकारियां ने बत्ता पौधा लगाबा रा निर्देश दिया। डीग मांय जलाशयां री साफ-सफाई करी गई अर ब्रजकामद सुरभि वन गौशाला मांय स्वच्छता अभियान चलायो गयो। कोटपूतली-बहरोड़ मांय पढणियां रैली काढ र पाणी बचाबा रो संदेश दियो। इण मौके केई होड़ां राखी गई। झुंझुनूं रा जिला स्टेडियम मांय भी खिलाड़ी पाणी बचाबा री शपथ ली।