प्रदेश मांय घणखर ठौड़ां ज़ोरदार तावड़ो पड़ रह्यो है, हालांकि कठे-कठे हल्की बारिश दर्ज करी ज्यी। श्रीगंगानगर ज़िला रा श्रीविजयनगर मांय दोपहरां री बगत बिरखा व्ही, जद के सीकर मांय काल सिंज्यां हल्की बरसात व्ही। इंर् बीचे बाड़मेर मांय आज लगातार चौथा दिन पारो 46 डिग्री सेल्सियस रे पार दर्ज करी ज्यो, जो सामान्य ऊं 7 डिग्री सेल्सियस बत्तो है। जैसलमेर, बीकानेर, चित्तौड़गढ़ अर चूरू मांय ई अधिकतम तापमान 44 ऊं 46 डिग्री सेल्सियस बीचे चाल रह्यो है। ईं रे अलावा अधिकांश ठौड़ां दिन री बगत पारो औसतन 42 डिग्री सेल्सियस ऊं ऊंचो दर्ज कर्यो जा रह्यो है। राज्य मांय पड़ रही तेज़ गर्मी अर लू ने ध्यान राखता थकां प्रशासन री ओर ऊं लोगां ने सावचेती राखण री राय दी जा रही है। जिला कलेक्टर ई मौसमी बीमारियां ऊं बचाव सारू सगळी ज़रूरी तैयारियां करण रा हुकम दीना है। इंर् सागे ई लोगां री आवण-जावण री खास ठौड़ां पीवण रा पाणी री व्यवस्था करी जा रही है। केई जिलां मांय खास बाजारां अर चौराहां कने छाया ई करी जावेला। कोटा मांय गर्मी ऊं बचाव री कोशिशां मांय सामाजिक संगठन ई प्रशासन री मदद सारू आगे आ रह्या है। डूंगरपुर मांय स्वास्थ्य विभाग री ओर ऊं मौसमी बीमारियां रो सामो करण री तैयारियां री मॉकड्रिल करी ज्यी।