प्रदेश मांय घणखर ठौड़ां लू बाजण सागे ज़ोरदार गर्मी पड़ रही है। केई ज़िलां मांय पारो 45 डिग्री सेल्सियस ने पार कर ग्यो। ज़बरदस्त गर्मी ऊं निजात सारू लोग भांत-भांत रा जतन कर रह्या है। मौसम विभाग रे मुजब प्रदेश मांय एक सप्ताह तांई ज़ोरदार लू बाजण री संभावना है। म्हाणा खबरनवीस बतायो के रात री बगत ई पारो ऊंचो रेहवण रा आसार है।
मौसम महकमा रे मुजब श्रीगंगानगर अर हनुमानगढ़ ज़िलां मांय आवता 2-3 दिन अधिकतम तापमान 47 ऊं 48 डिग्री सेल्सियस बीचे रेहवण अर ज़ोरदार लू बाजण री संभावना है। जयपुर, भरतपुर अर कोटा संभाग मांय दिन री बगत तेज़ लू बाजण अर रात री बगत ई ज़ोरदार गर्मी रेहवण रा आसार है। महकमा रे मुजब 15-16 जून ऊं कोटा अर भरतपुर संभाग मांय कठे-कठे हल्की बारिश सरू व्हेवण री संभावना है। बीकानेर संभाग अर आरे-सारे रा हलकां मांय आवता 2-3 दिन ज़ोरदार बायरो बाजण री शंका है। ज़ोरदार गर्मी ने ध्यान राखता थकां चिकित्सा अर स्वास्थ्य विभाग जनता ऊं सावचेती राखण री अपील कीनी है। श्रीगंगानगर मांय स्वास्थ्य केन्द्रां सागे अब जनता री आवण-जावण री ठोड़ां अब खास टीमां रे ज़रिए ओ.आर.एस. रो घोळ मुहैया करायो जा रह्यो है।