प्रदेश मांय घणखर ठौड़ां घणो तावड़ो पड़ रह्यो है। मौसम विभाग बाड़मेर ज़िला सारु हीटवेव रो रेड अलर्ट अर छह ज़िलां सारु ऑरेंज अर 12 ज़िलां सारु येलो अलर्ट जारी कीनो है। घणखर ठौड़ां अधिकतम तापमान 40 डिग्री सेल्सियस ने पार कर ग्यो है। बाड़मेर मांय लगातार चार दिन ऊं तापमान 45 डिग्री सेल्सियस ऊं ऊंचो दर्ज कर्यो जा रह्यो है। लारला 24 घंटां मांय चित्तौडगढ़, जैसलमेर, बीकानेर अर कोटा मांय अधिकतम तापमान 44 डिग्री सेल्सियस ऊं ऊंचो दर्ज करी ज्यो। मौसम विभाग 9 अप्रैल तांई गर्म रातां रो ‘वार्म नाइट अलर्ट’ जारी कीनो है। 10 अप्रैल ऊं इण मांय कुछ राहत मिलण रा आसार है, हालांकि श्रीगंगानगर, झुंझुनूं, अलवर अर भरतपुर ज़िलां मांय तेज़ तावड़ो पड़बा रा आसार है। 11 अप्रैल ऊं मौसम ओजू बदलण रे कारण गर्मी ऊं कुछ राहत मिलण री संभावना है। म्हाणा बालोतरा खबरनवीस बतायो के वठे ज़बरदस्त गर्मी अर लू रे कारण जिन्दगी माथे घणो असर पड़ रह्यो है। तेज़ गर्मी ऊं बचाव सारु प्रशासन री ओर ऊं ज़रुरी इंतजामात् कर्या जा रह्या है। झालावाड़ मांय लू ऊं बचाव सारु चिकित्सा अर स्वास्थ्य विभाग ज़रुरी दिशा-निर्देश जारी कीना है। न्यारी-न्यारी ठौड़ां ओ.आर.एस. रा घोळ रा काउंटर ई लगाया जा रह्या है। पाली मांय सड़कां माथे पाणी रो छिड़काव करायो जा रह्यो है। म्हाणा कोटा खबरनवीस बतायो के ज़िला कलेक्टर न्यारी-न्यारी ठौड़ां आश्रय स्थल बणावण रा हुकम दीना है। डूंगरपुर मांय ज़िला कलेक्टर अलकारां सागे मीटिंग कर र चिकित्सा, पेयजल अर दूजा महकमां रा अहलकारां ने तालमेल ऊं काम करण बाबत् कह्यो।