प्रदेश मांय घणखर ठोड़ां ईं चौमासा री बिरखा बंद व्ह्या पाछे अब पारो ओजू चढ़बा लाग्यो है। कठे-कठे तापमान 40 डिग्री सैल्सियस कने पूग ग्यो। मौसम केंद्र जयपुर रे मुजब हाल ई प्रदेश मांय चौमासा री बिरखा पूरी बंद नी व्ही है। केंद्र रा वैज्ञानिकां रे मुजब आवता दो दिन मांय ओजू बिरखा व्हेवण रा आसार है अर कठे-कठे छांटो- छिड़को या हल्की बिरखा व्हेवण री संभावना है। ईं बीचे जल संसाधन विभाग रे मुजब प्रदेश रा न्यारा-न्यारा बंधां मांय बूता रो 87 दशमलव 43 फीसदी पाणी आ ग्यो है। बांसवाड़ा संभाग रा बंधां मांय 97 दशमलव 89 फीसदी, कोटा संभाग रा बंधां मांय 94 दशमलव 11 फीसदी, जयपुर संभाग रा बंधा मांय 80 दशमलव 94 फीसदी, जोधपुर संभाग रा बंधा मांय 73 दशमलव 53 फीसदी अर उदयपुर संभाग रा बंधा मांय हाल तांई 72 दशमलव 88 फीसदी अर पाणी भर ग्यो है। चौमासा री ईं रूत मांय हाल तांई 406 बंधा पूरा भर ग्या है।