प्रदेश मांय घणखर ठोडां पड़ रही जबरदस्त गर्मी अर लू ऊं रोजमर्रा रा काम माथे घणो असर पड़ रह्यो है। जैसलमेर, बाड़मेर, बीकानेर, चूरू अर झुंझुनूं समेत केई ठोड़ां झुलसावण वाळी गर्मी पड़ रही है। बीकानेर अर जयपुर संभाग मांय दिन सागे रात री बगत ई तेज गर्मी रो असर है। जोधपुर ऊं म्हाणा खबरनवीस बतायो के ज़ोरदार गर्मी ने ध्यान राखता थकां प्रशासन अर चिकित्सा विभाग जनता ऊं सावधानी राखण री अपील कीनी है। मौसम विभाग आवता 4-5 दिन तांई बीकानेर अर जोधपुर संभाग अर शेखावाटी हलका मांय कठे-कठे लू बाजण रा आसार जताया है। दूजी कानी उदयपुर, कोटा अर भरतपुर संभाग मांय सोमवार ने कठे-कठे आंधी चालण अर गरज़ सागे हल्की बारिश री संभावना है। ईं बीचे राजसमंद मांय आखा दिन तेज गर्मी पाछे सिंज्या री पोर करीब आधा घंटा तांई मेह बरस्यो।