प्रदेश मांय घणखर ठोडां काल ऊं पारो 2 ऊं 3 डिग्री सेल्सियस तांई चढ़बा रा आसार है। मौसम विभाग गुरूवार ऊं जोधपुर अर बीकानेर संभाग मांय अधिकतम तापमान 44 ऊं 45 डिग्री सेल्सियस बीचे दर्ज व्हेवण रा आसार जताया है। ईं बीचे बुधवार ने ई केई ठोड़ां आंधी चाली अर बिरखा व्ही। म्हाणी हनुमानगढ़ खबरनवीस बतायो के ज़िला मांय केई ठौड़ां बिरखा सागे ओळा ई पड़्या। हनुमानगढ़ मांय बिरखा व्हेवण सागे ओळा ई पड़्या। श्रीगंगानगर जिला रा सूरतगढ़ अर पदमपुर मांय जोरदार बिरखा व्हेवण अर कठे-कठे ओळा पड़बा रा समाचार है। जिला रा अनूपगढ़ अर घड़साना मांय ई जोरदार मेह बरस्यो। बांसवाड़ा मांय दोपहरां पाछे रिमझिम बिरखा व्ही। उदयपुर मांय तेज बायरो बाजण सागे व्ही झमाझम बिरखा ऊं केई हलकां मांय पाणी भर ग्यो। दूजी कानी चूरू अर भीलवाड़ा समेत केई ठोडां आखा दिन जोरदार गर्मी अर उमस रही।