प्रदेश मांय गुरूवार ने ई केई ठौड़ां मेह बरस्सो। पाली अर बालोतरा मांय बिरखा पाछे सड़का माथे पाणी भर ग्यो। जालौर ज़िला रा सांचौर, रानीवाड़ा, भीनमाल अर आहोर मांय झमाझम बरसात व्ही। राजधानी जयपुर अर हनुमानगढ़ मांय कठे-कठे पाणी बरस्यो। मौसम विभाग गुरूवार ने प्रदेश रा 31 ज़िला मांय बिरखा व्हेवण रा आसार जताया है। आं मांय ऊं कुछ ज़िलां सारू ऑरेंज अलर्ट ई जारी करी ज्यो है। जयपुर अर बीकानेर संभाग मांय कठे-कठे बरसात री संभावना है। कोटा, उदयपुर, अजमेर अर जोधपुर संभाग रा कुछ हलकां मांय गुरूवार ने ई भारी ऊं घणी भारी बारिश व्हेवण रा आसार है, जद के जयपुर अर बीकानेर संभाग मांय कठे-कठे बरसात री संभावना है। मौसम केन्द्र जयपुर रा निदेशक राधेश्याम शर्मा बतायो के राज्य रा ऊगणी हलका मांय आवता चार-पांच दिन लगातार बरसात व्हेवण रा आसार है। इंर् सागे ई कठे-कठे भारी ऊं घणी भारी बारिश व्हे सके है। चौमासा री बिरखा ऊं राज्य रा छोटा-मोटा नदी-नाळां मांय मोटी तादाद मांय पाणी आ रह्यो है। 22 बंधा बूता रा आधा ऊं बत्ता भर ग्या है। कोटा रा राणा प्रताप सागर अर जवाहर सागर ऊं कोटा बैराज मांय पाणी री भरपूर आवक व्हे रही है। बैराज रा चार दरूजा खोल र 53 हजार क्यूसैक पाणी छोड़्यो जा रह्यो है। चोखी बिरखा पाछे किसान खेतां मांय साखा री बुआई सरू कर दीनी है। हनुमानगढ़ मांय धान री रोपाई रो काम सरू व्हे ग्यो है।