प्रदेश मांय केई ठौड़ां ज़ोरदार गर्मी सागे लू बाजण लागी है। बीकानेर, चूरू अर श्रीगंगानगर ज़िलां मांय पारो 45 डिग्री सेल्सियस ने पार कर ग्यो। पिलानी, बाड़मेर, जैसलमेर अर फलौदी मांय अधिकतम तापमान 44 डिग्री सेल्सियस ऊं ऊचो रह्यो। घणखर ठौड़ां दिन री बगत तापमान 40 डिग्री सेल्सियस ऊं ऊंचो रिकॉर्ड कर्यो जा रह्यो है। म्हाणा श्रीगंगानगर खबरनवीस बतायो के ज़िला मांय ज़ोरदार गर्मी पड़ रही है। मौसम विभाग बीकानेर अर श्रीगंगानगर मांय 20 मई तांई अधिकतम तापमान 45 ऊं 46 डिग्री सेल्सियस बीचे दर्ज व्हेवण रा आसार जताया है। इंर् बीचे आज कोटा, झालावाड़, चित्तौड़गढ़ अर बांसवाड़ा समेत नौ ज़िलां मांय आंधी चालण अर बारिश सारू चेतायी ज्यो है। आं ज़िलां मांय ज़ोरदार बायरो बाजण रा आसार ई जतायी ज्या है। भरतपुर मांय दोपहरा पाछे आया तेज अंधड़ सागे हल्की बरसात व्ही। राजधानी जयपुर मांय बधती गर्मी ने ध्यान राखता थकां नगर निगमां री ओर ऊं खास चौराहां अर सड़कां माथे पाणी रो छिड़काव करायो जा रह्यो है। ईं सागे ई लाल लाईट सामी रूकण वाळां ने तावड़ा ऊं बचावण सारू हर्या शामियाना ताणी ज्या है।