प्रदेश मांय केई ठौड़ां व्ही भारी बिरखा ऊं जिन्दगी माथे असर पड़्यो है। केई गांव खास गेलां ऊं कट ग्या है। बारां, सिरोही अर करौली समेत केई ठौड़ां चोखो मेह बरस रह्यो है। सवाईमाधोपुर ज़िला रा खण्डार मांय 23 सेंटीमीटर पाणी बरस्यो। वठे काल रात व्ही भारी बारिश पाछे सूरवाल बंधा माथे चादर चालण लागी है। आपदा प्रबन्धन मंत्री किरोड़ी लाल मीणा वठे रा हालात रो जायज़ो लीनो अर जनता री समस्यावां सुणी। वे नुकसाण रो सर्वे करावण अर राज्य सरकार कानी ऊं मदद दिरावण रो भरोसा दिरायो। हाड़ौती अंचल मांय केई ठौड़ां लारला दो दिन ऊं ज़ोरदार मेह बरस रह्यो है, जिण ऊं कालीसिंध, परवन, पार्वती, चम्बल, बाणगंगा समेत केई नदियां मांय पाणी उफण रह्यो है। पार्वती नदी मांय लगातार आ रह्या पाणी रे कारण कोटा ज़िला रा खातोली हलका मांय 50 ऊं बत्ता गेला बंद व्हे ग्या है। करौली ज़िला मांय मण्डरायल उपखण्ड रा केई गांवा मांय पाणी भरण ऊं हालात बिगड़ ग्या है। म्हाणा खबरनवीस बतायो के प्रशासन लोगां ने सुरक्षित ठौड़ां पूगा रह्यो है। धौलपुर मांय ई झमाझम बिरखा व्हे रही है। म्हाणा खबरनवीस बतायो के इण ऊं चम्बल नदी मांय पाणी रो लेवल खतरा रा निशान ने पार कर ग्यो है। ईं बीचे बुधवार ने बारां, बूंदी, चित्तौड़गढ, झालावाड़, कोटा अर प्रतापगढ़ ज़िलां मांय मूसलाधार बारिश रो रेड अलर्ट जारी करी ज्यो है। तेज़ बरसात रे कारण उपज्या हालात रो जायजो लेवण सारू बारां रा ज़िला कलेक्टर बुधवार ने किशनगंज अर शाहबाद ब्लॉक रा बालदा की पुलिया, दांता सहराना अर ऊनी हलकां रो दौरो कीनो। मौसम विभाग रे मुजब जयपुर, अजमेर, बीकानेर अर जोधपुर संभाग रा कुछ हलकां मांय काल भारी ऊं घणी भारी बारिश रा आसार है जद के कोटा, उदयपुर अर भरतपुर संभाग मांय कठे-कठे मझला दर्जा ऊं ले र घणी ज़ोरदार दर्जा री बिरखा री संभावना है। महकमा रे मुजब राज्य रा लंकाऊ-ऊगणी हलकां मांय एक अगस्त ऊं भारी बारिश ऊं साता मिलण रा आसार है। मौसम विभाग कानी ऊं भारी बारिश सारू चेतायां पाछे जयपुर कने जमवारामगढ़ बंधा मांय काल अप्राकृतिक बिरखा करावण रो कार्यक्रम टाळ दियो ज्यो है।