प्रदेश मांय केई ठौड़ां माथे मॉनसून री बिरखा रो दौर जारी है। पाली ज़िला मांय दीतवार ने हल्की सूं मध्यम बिरखा दर्ज व्ही। झुन्झुनूं अर राजधानी जयपुर मांय भी सुवांरे सूं रूक-रूक र बरसात रो दौर जारी है। सवाईमाधोपुर मांय बदळ गरजबा रे सागे तेज़ पाणी बरसबा सूं उमस सूं थोड़ी राहत मिली। सिरोही ज़िला मांय भी दीतवार ने तेज बरसात रो दौर जारी है। हनुमानगढ़ जिला रा पीलीबंगा हलका रा विलौचा गांव मांय बिरखा री बजह सूं मकान री छत पड़बा सूं एक जणा री मौत व्हे ग्यी। मौसम केन्द्र जयपुर रे मुजब दीतवार ने राज्य रा घणखर हलकां मांय मानसून सक्रिय रहबा सूं बादळ गरजबा रे सागे कठे-कठे मझळी सूं तेज बारिश व्हे सके है। दीतवार ने सिरोही, पाली अर जालौर जिला खातर भारी बारिश रो ऑरेंज अलर्ट जारी कर्यो गयो है। इण रे अलावा बीकानेर, चूरू, गंगानगर अर हनुमानगढ़ ने छोड र बाकी 26 जिलां मांय येलो अलर्ट है। वठिने आवता चार-पांच दिन पूर्वी राजस्थान रा कुछ एक हलकां मांय तेज बारिश अर कठे-कठे भारी बारिश होबा रा आसार है। वठिने जोधपुर अर बीकानेर संभाग री बत्ती ठौड़ां मांय भी आवता दो-तीन दिन मध्यम सू तेज बारिश होबा री आस है।