प्रदेश मांय केई ठौड़ां चोखो मेह बरस्यो है। सिरोही ज़िला रा माउंटआबू अर श्रीगंगानगर मांय कठे-कठे 70 ऊं 90 मिलीमीटर तांई पाणी बरस्यो। श्रीगंगानगर अर हनुमानगढ़ ज़िला मांय आज ई ज़ोरदार बिरखा व्ही। चूरू, भरतपुर अर धौलपुर ऊं ई बिरखा रा समाचार मिल्या है। ईं बीचे प्रदेश रा न्यारा-न्यारा बंधां मांय लगातार पाणी आ रह्यो है। टोंक ज़िला रा बीसलपुर बंधा मांय पाणी रो लेवल बध र 314 दशमलव 3 आर एल मीटर व्हे ग्यो है। मौसम विभाग रे मुजब आज बाड़मेर अर जैसलमेर ज़िला मांय केई ठौड़ां ज़ोरदार बिरखा रा आसार है। महकमो आवता 48 घंटा मांय भरतपुर, जयपुर अर उदयपुर संभाग मांय कठे-कठे बिरखा रा आसार जताया है। महकमो कोटा, उदयपुर अर भरतपुर संभाग मांय 2 सितंबर ऊं बिरखा मांय ओजू बधोतरी व्हेवण अर कठे-कठे घणी जोरदार बिरखा रा आसार जताया है। ईं बीचे गुजरात मांय बरस रह्या ज़ोरदार मेह रे कारण प्रदेश मांय ई रेलां री आवण-जावण माथे असर पड़्यो है। उत्तर पश्चिम रेलवे रा मुख्य जनसम्पर्क अधिकारी कैप्टन शशि किरण बतायो के लारला दो दिन मांय उत्तर पश्चिम रेलवे री 12 गाड़ियां रद्द कर करणी पड़ी है। गुजरात मांय वड़ोदरा मंडल री एक पुलिया माथे पाणी भर जावण रे कारण उत्तर पश्चिम रेलवे री 21 गाड़ियां ने दूजा गेलां ऊं चलायी जा रही है जद के 9 रेलां आंशिक तौर ऊं रद्द कर दीरीजी है।