राज्य मांय केई ठोडां भारी बारिश जदके कठे-कठे घणी भारी बिरखा व्ही है। मौसम केन्द्र जयपुर रे मुजब लारला चौबीस 24 घंटां मांय बूंदी ज़िला रा नैनवा, नागौर ज़िला रा मेड़ता अर टोंक जिला रा दूणी मांय सब ऊं बत्तो 23-23 सेंटीमीटर पाणी बरस्यो। प्रतापगढ़, धौलपुर, राजसमंद, दौसा अर जोधपुर ज़िलां मांय ई कठे-कठे 10-10 सेंटीमीटर ऊं बत्ती बारिश व्ही। ज़ोरदार मेह ने ध्यान राखता थकां प्रशासन जनता ऊं तळावां, नदियां अर बंधां रा आरे-सारे रा हलकां मांय नी जावण री अपील कीनी है। घणी बिरखा ऊं केई शहरां रा रिहायशी हलकां अर गांवां रा खेतां मांय पाणी भर ग्यो। पाणी भरण रा हालात ने ध्यान राखता थकां बाड़मेर, झालावाड़, कोटा, बूंदी अर अजमेर री स्कूलां मांय छुट्टी रो ऐलाण कर दियो ज्यो है। अजमेर ज़िला रा नसीराबाद, पीसांगन, पुष्कर, किशनगढ़, सरवाड़, अरांई अर भिनाय मांय ज़ोरदार मेह बरस्यो। म्हाणी अजमेर खबरनवीस बतायो के ज़िला रा केई बंधां अर तळावां माथे पाणी री रपट चाल रही है। विधानसभा अध्यक्ष वासुदेव देवनानी अजमेर मांय घणी बिरखा रा असर वाळा हलकां रो दौरो कीनो। शिक्षा मंत्री मदन दिलावर ई थावर ने दूजा दिन कोटा रा रामगंज मंडी मांय बिरखा रा असर वाळा हलका रो दौरो कर र नुकसाण रो जायज़ो लीनो। मौसम विभाग थावर ने जोधपुर संभाग अर आरे-सारे रा हलकां मांय भारी बारिश रो रेड अलर्ट जारी कीनो है। मौसम केन्द्र जयपुर रा निदेशक राधेश्याम शर्मा बतायो के राज्य रा ऊगणी हलकां मांय थावार ने अर आतूणी हलकां मांय दीतवार ऊं बारिश रो ज़ोर कम पड़बा रा आसार है।